ATENDE

O goberno afoga ás asociacións culturais e de festas

By Admin on abril 15, 2013

(Ames 15-04-2013) O goberno do PP de Ames dá unha volta máis nos seus resortes e afoga ás actividades das asociacións culturais e de festas ao reducir a menos da metade as axudas municipais entre o 2010 e 2012, co único fin de sumar euros ao seu Plan de Axuste.

Nos últimos dous anos produciuse un descenso drástico nas achegas do Concello a Asociacións culturais e de festas, caendo dos 85.273,51 € en 2010 aos 39,201,24 en 2012, ou sexa o concedido neste ano supón é só o 45,97 % do que se concedeu hai dous anos, o que pon en perigo a continuidade desas actividades. Nin sequera a crise económica xustifica esta situación, xa que o orzamento é moi superior ao que finalmente o Concello concedeu, para este ano 2012 -resolvido en marzo de 2013- o fixado na convocatoria de subvencións ascendía a 69.600€ e o concedido son 39.201,24€, só se concede o 56,32% do orzamentado para asociacións culturais e de festas. E aínda estamos á espera do que acontecerá cos clubs e asociacións deportivas.

As razóns diso están en primeiro lugar nunhas bases de convocatoria draconianas nos requisitos de xustificación que desincentivan facer as solicitudes, pero tamén unha información insuficiente e a falta de iniciativas de promoción e apoio por parte da administración ás asociacións para que fagan esas solicitudes. Ademais tampouco axudan con outros medios, pois a achega de palcos ou carpas que antes se facía desapareceu na maioría dos casos. Son igualmente graves as condicións para a percepción destas achegas; un caso concreto, para poder percibir 600 euros debe xustificar 3.000, esa asociación pois non vai recibir nin o importe do IVA da factura que ten que aportar para poder cobrar, e ademáis soportar o resto do orzamento non subvencionado. Lamentable.

Quen se atreverá nestas condicións a promover ningún tipo de actividade cultural?. Volvemos aos tempos escuros.

Ante este desprezo e abandono irresponsable do goberno, Ames Novo presentou unha MOCIÓN DE AMES NOVO SOBRE AS ACHEGAS A ASOCIACIÓNS CULTURAIS E DE FESTAS para que se repartan o conxunto das contías fixadas nas convocatorias das asociacións, e constituír unha comisión entre as forzas políticas municipais e as asociacións culturais e de festas para consensuar unhas bases que potencien e faciliten o traballo das entidades, e que se faga a convocatoria no comezo do ano que podan saber de que cartos poden dispoñer. Tamén se propón que se fixe o 0,5% do orzamento municipal con destinos ás axudas e convenios para entidades culturais e de festas, determinando unha referencia que non varíe a discreción dos gobernantes de cada momento.

Concesión de Subvencións actividades culturais e de festas
	Ano 2010	Ano 2011	Ano 2012 (concedida abril de 2013)
Actividades Culturais	Concedido: 49.888,55€ (26 entidades)	40.048,97€ (22 entidades)	23.401,24€ (15 entidades)
Festas populares	35.384,96€ (12 comisións festas)	23.639,77€ (10 comisións de festas)	15.800 € (8 comisións de festas)
TOTAL	85.273,51€	63.688,74€	39.201,24€