MANIFESTO DA INICIATIVA CIDADÁ AMES NOVO

NON SOMOS PARV@S. QUEREMOS DECIDIR!

 Diante do grave deterioro xeral do sistema político, que en Ames se manifesta con especial crueza na xestión dun goberno incapaz de xestionar os servizos públicos e que agocha a súa incompetencia e desprezo dos intereses da maioría en mentiras e escurantismo, dirixímonos á cidadanía para manifestar:

Consideramos que a crise está a servir de escusa para impor o dominio dos intereses dunha minoría privilexiada por riba dos da inmensa maioría da poboación.

• Acreditamos en que a transformación da institución municipal para poñela ao servizo dos intereses e necesidades da maioría só é posible mediante a aglutinación de todas as ansias transformadoras que se desenvolven no seo da sociedade amesá.
• É preciso vincular directamente aos representantes cos representados, superando as estruturas partidarias, decidindo desde a propia cidadanía quen serán as persoas que se candidaten para representala no Concello.
• O voto non pode ser un cheque en branco para que os cargos electos fagan e desfagan ao seu antollo. A cidadanía debe ter a capacidade de dialogar, facer propostas, escoitar e ser escoitada. Ter a posibilidade de decidir o que é mellor para o seu conxunto.
• A acción municipal ten que estar guiada polos principios de transparencia e participación. Os cargos deben estar permanente a disposición de quen os elixiu e someterse a mecanismos de revogación democrática.
• Os recursos comúns son de todos e non poden servir para o beneficio duns poucos. Os servizos públicos deben ser xestionados de xeito eficaz e con controles democráticos desde o propio Concello.
• A igualdade ten que ser un principio e un obxectivo central da acción municipal. Son necesarias políticas que fomenten a igualdade real de homes e mulleres e que combatan calquera forma de discriminación ou exclusión social.
• Poñamos fin aos amiguismos, enchufismos e clientelismos. O Concello non pode ser un lugar para pedir favores, senón para reclamar os nosos dereitos.
• É imprescindible construír, tamén desde o Concello, modelos de desenvolvemento sostible en termos sociais e medioambientais.
• O patrimonio cultural, artístico e lingüístico forman parte do inventario dos bens colectivos e a institución municipal debe velar pola súa conservación e posta en valor impulsando políticas potenciadoras da cultura.
• O tempo das palabras xa pasou. Esiximos dos nosos representantes compromisos claros de honestidade, diálogo e transparencia, e que o demostren con feitos.

Desde estas conviccións facemos un chamamento ás nosas veciñas e veciños a integrar unha asemblea cidadá, participativa e horizontal, que sexa quen de impulsar unha candidatura da maioría para as eleccións municipais do 2015 que poña o concello ao servizo da veciñanza.

Recuperemos a ilusión. Deixemos de lado a vella política e o seu cheiro a rancio. Fagamos un futuro mellor entre tod@s. Xunt@s é posible.

Este manifesto foi asinado xa por 355 persoas (187 mulleres e 168 homes). Únete  á marea de asinantes

Formulario de sinatura do manifesto  

LISTADO DE ASINANTES (Por orde alfabética)